Saturday, January 22, 2011

ఆ ఒక్కరు ఇక లేరు..

ఈ రోజు ఉదయం పేపర్ లో ఇవివి మరణ వార్త చూసినవెంటనే నిజంగా నోట మాట రాలేదు. ఎన్నో ఎంటర్ టైనింగ్ సినిమాలు, వాటితో పాటు మరికొన్ని అర్థవంతమైన సినిమాలు అందించిన ఇవివి ఇక లేరు అంటే ఒప్పుకోడానికి చాలా కష్టంగానే ఉంది, ఆయన లోటు ఖచ్చితం గా భర్తీ చెయ్యలేనిదే. నా మటుకు నాకు ఆయన డైరెక్ట్ చేసిన ఆ ఒక్కటి అడక్కు బాగా గుర్తు, మా అన్నయ్యలతో, కజిన్స్ తో ఆ సినిమా ఎన్ని సార్లు చూసానో లెక్కే లేదు. కుటుంబంతో చూడ్డానికి కాస్త ఇబ్బందే అయినా, ఆయన తీసిన కొన్ని సినిమాలు చూసిన ప్రతీసారి కడుపుబ్బా నవ్విస్తాయి. ఆ సన్నివేశాలు గుర్తొచ్చి మరీ గిలిగింతలు పెడతాయి. తెలుగు సినిమా ఫార్ములా సీన్ల మీద, మొదట సెటైర్లు పేల్చినది ఆయనేనేమో కూడా.

జంధ్యాల బ్రాండ్ కామెడీ కే కాస్త బూతు,సెటైర్ జోడించి తనదైన శైలి సృష్టించారు ఇవివి. ఆయన మొదటి సినిమా "చెవిలో పువ్వు" లో అనుకుంటా, టైటిల్స్ లోనే "యాక్షన్" కి బదులు "కట్" చెప్పి, మొదట సినిమా కదండీ క్షమించెయ్యండి అంటారు ఇవివి. ఆమె, అల్లుడా మజాకా, ఆరుగురు పతివ్రతలు -- ఈ మూడు చిత్రాలు ఒక్కరే దర్శకత్వం వహించారంటే నమ్మశక్యం కాదు. ఒక టైం లో అగ్రశ్రేణి హీరోలు ఆయన డేట్స్ కోసం వేచి చూసేవారంటే అతిశయోక్తి కాదు. పవన్ కళ్యాణ్ ని పరిశ్రమకి పరిచయం చేసే బాధ్యతా, చిరు ఆయన పైనే పెట్టారు అందుకే. ఒకటో రెండో హిట్లు వస్తేనే ఆస్కార్ అవార్డు వచ్చిన బిల్డప్ ఇస్తున్న ఈ రోజుల్లో, అన్ని విజయవంతమైన చిత్రాలు ఇచ్చినా ఇవివి, లో ప్రొఫైల్ లోనే ఉన్నారు ఇన్నాళ్ళు. అడపాదడపా తన దైన శైలి లో చిత్రాలు తీస్తూనే ఉన్నారు.

ఇష్టపడి చదువుతున్న సరదా పుస్తకం సగంలోనే అయిపోయినట్టు అనిపిస్తోంది నాకు. మరికొన్ని మంచి చిత్రాలు మిస్ అయ్యాం మనం అందరం. పరిశ్రమ కాస్త హడావిడి చేసి మరచిపోతుందేమో, కానీ ప్రేక్షకులు మాత్రం ఆయన్ని, ఆయన అందించిన చిత్రాలని ఎప్పటికీ గుర్తుంచుకుంటారు. "మార్చ్ అంటే, ఇది మార్చ్ కాదు ఏప్రిల్", "డిక్కీ ఎలా ఉందండీ.. డిక్కీ.. ", "అప్పు.. డే తెలవారిందా" లాంటి డైలాగ్లు నేనైతే మరచిపోను.

1 comment:

  1. EVV started new Trend with his different names like AA okkati Adakku, Aavida maa aavide, Vedevadandi babu and Adanthe ado typu etc.He did great job in getting COMMEDY as a strong selling point in telugu films.

    ReplyDelete