Tuesday, July 1, 2014

హమ్మయ్యా అల్జీరియా ఓడిపోయింది!!

నిన్న జరిగిన ఫుట్ బాల్ మాచ్ లో అల్జీరియా జర్మనీ చేతిలో ఓటమి చవి చూసింది. చివరిదాకా ఎంతో ఉత్కంఠతో జరిగిన పోరాటంలో, జర్మనీ మొత్తానికి గట్టెక్కింది. ఇంతవరకూ బానే ఉంది, ఇందులో నాకు "హమ్మయ్యా" విషయం ఏంటా అనే కదా మీ పెను అనుమానం. చెప్తా.. చెప్తా..

పేరుకి పారిస్ లోనే ఉంటున్నా, నిజానికి నేను ఉన్న ఏరియా పేరు పోంథన్. అది ఒకప్పుడు పాపం ఓ చిన్న వూరు, పారిస్ పెద్దది అయ్యి, అయ్యి, ఇలా చుట్టూ ఉన్న ఎన్నో చిన్న వూళ్ళని తినేసింది. మన గ్రేటర్ భాగ్యనగరం లా అన్నమాట. పారిస్ కి అన్ని వైపులా ఉన్న మెట్రో రైళ్ళ వల్ల, ఎక్కడున్నా, పెద్దగా వ్యత్యాసం తెలియదు. ఈ పోంథన్ లో ఒకప్పుడు చిన్నా చితకా పరిశ్రమలు ఉండేవి, ఇప్పుడు అవన్ని మూతపడి, వాటి స్థానంలో బ్యాంకులు, వ్యాపార సంస్థలు, హొటల్స్ వచ్చేసాయి. కానీ ఎప్పటినుంచో స్థిరపడ్డ ఆఫ్రికన్స్ ఇంకా కనిపిస్తుంటారు. సెంట్రల్ పారిస్ లో కంటే, ఈ చుట్టూ ఉన్న ఊళ్ళలో వలస వచ్చి స్థిరపడ్డవారు ఎక్కువ. మా ఏరియాలో ఏం మహత్యమో కానీ, అల్జీరియా దేశానికి విపరీతమైన ఫాన్ ఫాలోయింగు. ఆ దేశం మాచ్ గెలిస్తే చాలు, మా హొటల్ ముందు అర్థరాత్రి పెద్ద యెత్తున సంబరాలు. సైకిళ్ళ మీద రోడ్డుకు అడ్డంగా విన్యాసాలు, బాణసంచా, మందు, చిందులు.. మొదటి రెండు సార్లు ఏదో ఫ్రాన్స్ ఆట గెలించిందేమో అనుకున్నా.. మూడో సారి తీక్షణం గా చూస్తే, ఆ జెండా రంగు వేరేగా ఉందనీ, డాన్సులు వేస్తున్న జనాల్లో కొన్ని రంగులే కనిపిస్తున్నాయని అర్థం అయ్యింది. గూగుల్ ని వాకబు చేస్టే అల్జీరియా సంగతి కొంచం బోధ పడింది. ఆఫీసులో మరి కాస్త భోగట్టా చేస్తే, అప్పుడు తెల్సింది, అల్జీరియాకి పారిస్ లో బోలుడంత అభిమానులున్నారని.

ఏదైతేనేం అప్పటినించి అల్జీరియా మాచ్ ఉందంటే చాలు, మాకు గుండెల్లో మెట్రో రైళ్ళు టికెట్టు అడక్కుండానే పరిగెట్టెస్తున్నాయి. మా బుడ్డోడు పడుకోవడమే పదివేలు అనుకుంటే, వీళ్ళ గోలతో వాడు ఎక్కడ లేస్తాడో అనే భయం తో మేము ముందు లేచి కూర్చుంటున్నాం. వాడు లేవడు అన్నది వేరే సంగతి.

సో ఇందు మూలంగా, సవినయం గా నేను ఆనందిస్తున్నది ఏంటంటే, నిన్నటి మాచ్ తో అల్జీరియా ప్రపంచ కప్పు నుంచీ ఇంటికి వెళ్ళిపోయింది కాబట్టి, మరియు మన రియాలిటీ షోల్లో లాగ వైల్డు కార్డు వగైరాలు ఏమీ లేకపోవడం వల్ల, మాకు అర్థరాత్రి హడావిడి నుంచీ విముక్తి లభించిందని ఆశిస్తున్నాను.ఓడిపోయినందుకు ఎక్కడైనా కొవ్వొత్తు ప్రదర్శనలు జరిగాయేమో నా దృష్టిలో పడలేదు మరి.

ఏవేవో దేశాలన్నీ ఫిఫా లో దంచేస్తున్నాయి, మన దేశం ఏది అని మా ఆవిడ నన్ను రోజుకి నాలుగు సార్లు నిలదీసేస్తోంది. నేను ఏంచెయ్యగలను చెప్పండి, నాపేరు శ్రీనివాసన్ కాదు కదా.. అదే మొత్తుకుంటున్నాను. మా చెర్రీ గాడు ఏమైనా పెద్దయ్యాక ఇండియా తరపునో, మరి అప్పటికి ఏ చైనావో మనల్ని పూర్తిగా కలిపేసుకుంటే వాళ్ళ తరపునో ఫుట్ బాల్ ఆడి, అల్జీరియా మీద గెలిచి, ప్రతీకారాలు వగైరాలు తీర్చుకుంటాడేమో.. వేచి చూడాలి.

1 comment:

  1. Saaare......mana desam worldcup ki qualify koodaa avvaledu kada. Manam bahusa 147 place lo anukunta vunnamu.
    pothe mana desam lo antharjaateeya sthaayi football stadium koodaa leduta. Ika gelavadam sangathi go..hoo..vindaa...
    ayinaa manaki , meerannuttu srinivasan vunnaadu, cricket betting loo, inka teravenaka bhaagothaaloo ....chandaalam anthaa telusu gada.
    manaki cinema staarluu, vaalla fanloo, kotlu venakesukuni desaaniki aadaleni cricket taaraluu.....chaalchaalu.

    ReplyDelete