Sunday, July 24, 2016

భయం లేదు..


ఈ ప్రయాణం గమ్యంతో అంతమవ్వదు..
ఈ పయనానికి అంతమే గమ్యం.
ఏ విరామం, విశ్రాంతి నాకు ఆటవిడుపు ?
కళ్ళు వెతుకుతూనే ఉంటే, కాళ్ళు చతికిలబడ్డా,
ఆలోచనలు ఆగక అలసిపోతుంటే, కళ్ళు మూతబడ్డా..

"నేను" లేని ప్రపంచం కోసం నేను మథనపడతాను.
"నా" లోనే. "నా" అంతా.

ఏ సందు చివరో నేను ఆగిపోతాను.
ఏ తెలియని మలుపు వద్దో.
అది నాకు ఇష్టమైనదో కాదో..
నేను ఓడినట్టో, లేక గెలిచినట్టో..
నా వెంట ఇక రాని "నా" వాళ్ళందరిలోనూ..
కొంతైనా నేను మిగులుతానా ?
నాదో, మరి కాదో తెలీని ఈ పోరాటానికి..
రవ్వంతైనా ముద్ర ఉంచి సాగుతానా ?

నాకు తెలిసే అవకాశం లేదుగా.
భయం లేదు.

నేను కోరుకుంటే మొదలవ్వలేదు ఇది..
ఆగడానికి నా అనుమతి అడగదు.
అడుగులు నావే అయినా..
నడక నాది కాదు. అది కాలానిది.
గమనం నాదే అయినా..
గమ్యం యాదృచ్చికం. అది జీవితానిది.




1 comment: